azertexnikabalacasuqabi
nabranbalaca
nabranbalaca
Azertexnikaortaşinlərbalaca

Mob:(+99450)504 37 04

Meyvəli meyvə-tərəvəz logistik mərkəzi istifadəyə verilib

Meyvəli meyvə-tərəvəz logistik mərkəzi istifadəyə verilib
Meyvəli meyvə-tərəvəz logistik mərkəzi istifadəyə verilib
Dekabrın 27-də Bakı şəhəri, Qaradağ rayonu, Lökbatan qəsəbəsi, Xocasən yolu 57 ünvanında "Meyvəli" meyvə-tərəvəz logistik mərkəzi istifadəyə verilib.
Kənd təsərrüfatı naziri Heydər Əsədov mərkəzin açılış mərasimində iştirak edib.
Nazir topdan və pərakəndə meyvə satışı talvarlarına, yeni tikilmiş soyuducu anbarlara, inzibati idarəetmə binalarına baxış keçirib və tərəvəz bitkilərinin çeşidlənmə şəraiti ilə tanış olub.
Daha sora kənd təsərrüfatı naziri Heydər Əsədov yeni logistik mərkəzin təməl qoyma mərasimində iştirak edib.
Kənd təsərrüfatı naziri Heydər Əsədov mərasimdə bildirib ki, "Meyvəli" logistik bazasında müxtəlif ixtisaslaşma aparılmaqla həm kiçik pərakəndə, həm topdansatış, həm də kiçik topdansatış bazaları yaradılmaqla əhalinin bu ya digər kənd təsərrüfatı məhsullarına, eləcə də ərzaq məhsullarına olan tələbatının ödənilməsi məqsədilə yaradılıb.
H.Əsədov deyib ki, "Meyvəli" logistik bazasının əhəmiyyəti olduqca böyükdür: "Burada əsas məqsəd kənd təsərrüfatı istehsalçıları tərəfindən istehsal olunmuş məhsulların istər topdan, istərsə də pərakəndə satışının, saxlanılmasını və ixracının təşkilinə köməklik göstərməkdir".
Logistik bazanın 54 hektardan artıq ərazisinin olduğunu vurğulayan nazir qeyd edib ki, gələcəkdə bu sahənin inkişafı nəzərdə tutulub: "Gələcəkdə burada ərzaq, balıq məhsullarının və gül təsərrüfatı məhsullarının yaradılması nəzərdə tutulub".
Nazir bildirib ki, bu gün Bakı şəhərinin tələbatının böyük bir hissəsi bu bazadan qaynaqlanır: "Bu baza təkcə əhalinin ərzaq məhsullarına ola tələbatını ödəməklə deyil, eyni zamanda dövlətlə əməkdaşlıq edərək bazara dövlətin tənzimləmə nəzarət funksiyasını həyata keçirməyə imkan verəcək. Çünki burada bolluq yaratmaqla, Kənd Təsərrüfatı Nazirliyi logistik baza ilə əməkdaşlıq edərək bazara istənilən vaxt müdaxilə edə biləcək. Bu baza vasitəsilə məhsulların qiymət meyllərini analiz və təhlil edərək, yaranmış tendensiyanı qiymətləndirərək nazirlik baza vasitəsilə bazara məhsul çıxara biləcək. Bu baza bir növ dövlətin tənzimlənmə funksiyasının yerinə yetirilməsində geniş istifadə olunacaq".
Nazir qeyd edib ki, yeni yaradılan logistik baza yerli fermerlərin öz məhsullarını rahat satması üçün çox əhəmiyyətli olacaq: "Burada fermerlər öz məhsullarını anbarlarda yerləşdirə biləcək. İstənilən fermer buranın imkanlarından yararlana bilər".
Azərbaycanda keçən il baş verən quraqlıq zamanı zərər çəkən fermerlərin dövlətdən aldığı toxuma görə yaranan borcu silinəcək. Bunu jurnalistlərə açıqlamasında kənd təsərrüfatı naziri Heydər Əsədov deyib.
Onun sözlərinə görə, ötən il ölkədə ciddi quraqlıq olub və 4 rayon bundan zərər görüb: "Qobustan rayonunda demək olar ki, taxıl və toxum məhsulları olmayıb. Kombaynlar heç sahələrə belə çıxmayıb. Şamaxı, Şəkidə də əhali quraqlıq səbəbi ilə zərər görüb. Qəbələdə isə bəzi sahələri dolu vurub və il ciddi zərərlə başa çatıb".
Nazir bildirib ki, sığorta mexanizmi işləmədiyindən əhaliyə kompensasiya verilməyib: "Burada əkin problemi yaranmışdı. Kənd Təsərrüfatı Nazirliyinin toxumçuluq müfəttişliyi və müvafiq aidiyyəti qurumlar vasitəsilə tədbirlər görülüb. Həmin sahələrə xarici ölkələrdən toxumlar gətirilib və fermerlərə paylanılıb. Həmin adı sadalanan rayonlarda zərər görmüş, zərərin nəticəsini müvafiq aktlarla rəsmiləşdirilmiş və nazirliklə razılaşdırılaraq toxum borca götürmüş müəssisələrin borcları bu günlərdə silinəcək".
Nazir əlavə edib ki, burada təxminən 3 milyon manata yaxın vəsaitdən söhbət gedir. Onun sözlərinə görə, 4 rayonda zərərçəkənlər borcunu qaytarmayacaqlar: "Dövlət bu borcu öz üzərinə götürür və yəqin ki, bu günlərdə ehtiyat fondundan vəsait ayrılaraq həmin borcların silinməsi həyata keçiriləcək. Bu, digər toxum alanlara aid deyildir".
Kənd Təsərrüfatı Nazirliyi bayramqabağı bazarlarda süni qiymət artımının olmaması üçün nəzarət tədbirlərini gücləndirib. Bunu jurnalistlərə açıqlamasında kənd təsərrüfatı naziri Heydər Əsədov bildirib.
Onun sözlərinə görə, nazirlik bayramqabağı bazarlarda kənd təsərrüfatı məhsullarında süni qiymət artımının və bahalaşmanın olmaması üçün stimullaşdırıcı tədbirlər görür və bazarlarda bolluq yaratmağa çalışır: "Süni qiymət artımının qarşısını almaq məqsədi ilə hazırda müavinim və nazirlik əməkdaşları Xətai yarmarkasındadır. 30 nəfərdən artıq əməkdaşımız digər yarmarkalardadır. Bizim məqsədimiz bazarda stimullaşdırıcı tədbirlər görərək bolluq yaratmaqdır".
Nazir əmin edib ki, bazarlarda qiymət artımı və məhsul qıtlığı ilə hər hansı təhlükəli meyl gözlənilmir.
Azərbaycanda kooperativ fermer təsərrüfatlarının yaradılması ilə bağlı qanun layihəsi hazırlanıb. Eləcə də bunu jurnalistlərə açıqlamasında kənd təsərrüfatı naziri Heydər Əsədov bildirib. O deyib ki, kooperativ təsərrüfatların yaradılmasının əsas şərtlərindən biri həvəsləndirici tədbirlərin hazırlanmasıdır: "Prezident İlham Əliyevin müvafiq fərmanına uyğun olaraq bu məqsədlə qanun layihəsi hazırlanıb. Sənəd müzakirə olunmaq üçün Milli Məclisə təqdim edilib. Kənd Təsərrüfatı Nazirliyi bu qanunun hazırlanmasında yaxından iştirak edib. Qanun qəbul edildikdən sonra görüləcək tədbirlərin konsepsiyasından asılı olaraq bu istiqamətdə işləri daha da sürətləndirəcəyik".
Heydər Əsədov Rusiyanın bəzi məhsulların idxalına qadağa qoymasına münasibət bildirib-Azərbaycanın kənd təsərrüfatı naziri Heydər Əsədov Rusiyanın gələn ildən karantin nəzarətində olan məhsulların Azərbaycan da daxil olmaqla, bir neçə ölkədən idxalına qadağa qoyması məsələsinə münasibət bildirib.
H. Əsədov jurnalistlərə açıqlamasında bildirib ki, Rusiyada rublun ucuzlaşması prosesi başlayana qədər Azərbaycan kənd təsərrüfatı məhsul istehsalçıları bu bazarda xüsusi yer tutub.
Onun sözlərinə görə, ilin əvvəlindən Rusiyaya kənd təsərrüfatı məhsullarının ixracının həcmi dəyər ifadəsində 17% artıb: "Amma Rusiyadakı son vəziyyət Azərbaycan məhsullarının bu bazara ixracına marağı azaldıb. Bu gün rublun dəyəri kəskin olaraq dəyişir. Belə bir şəraitdə kənd təsərrüfatı məhsullarının ixrac edilməsi, sabah bazarda hansı qiymətlərlə satılacağını bilmədən bazara çıxardılması müəyyən risklər yaradır":
Nazir qeyd edib ki, son bir neçə gün ərzində Azərbaycanın kənd təsərrüfatı məhsullarının Rusiyaya ixracında azalma müşahidə olunur: "Bu da təbii haldır. Çünki, istehsalçılar belə vəziyyətdə məhsullarını yerli valyutanın sabit olmadığı yerlərdə satışa çıxarmaq istəmirlər. Bu vəziyyət bizim yerli bazarlarda qiymətlərin ucuzlaşmasına səbəb olub. İxracın azalması kimi meyllər olsa da, burada ciddi təhlükə yoxdur".
Nazir bildirib ki, Azərbaycan kənd təsərrüfatı istehsalçılarının Rusiya bazarlarında möhkəmlənmiş yerləri və sabit kanalları var və bu azalma təhlükəli həddə deyil.
"Azərbaycanda taxıl qıtlığı ilə bağlı narahatlığa əsas yoxdur. Rusiya taxıl üçün nəzərdə tutduğu və proqnozlaşdırdığı ixrac imkanlarının 90%-ni artıq istifadə edib.
Bunu jurnalistlərə açıqlamasında Rusiyanın taxıl ixracına qoyduğu qadağaya münasibət bildirərkən kənd təsərrüfatı naziri Heydər Əsədov deyib.
Onun sözlərinə görə, bu qadağa Azərbaycan bazarına təsir göstərməyəcək. "Biz daim beynəlxalq trendləri araşdırırıq. Həm Avropa bazarında, həm də Amerika, xüsusilə Çikako bazarlarındakı taxılın qiymətlərini izləyirik. Məlumat üçün deyirəm ki, bu il dünya üzrə taxıl ehtiyatının həcmi 7 milyon tondan çox olmuşdur. Bu rəqəm taxılla bağlı ciddi bir narahatçılığın olmadığını göstərir".
Nazir deyib ki, ötən il dünyada taxıl ehtiyatı 30 milyon ton artıb ki, bu da qiymətin düşməsinə səbəb olub: "Bu ilin sonunda yenidən dünya üzrə taxıl ehtiyatı artıb. Azərbaycanın istənilən bazarla əməkdaşlıq etmək imkanları var və dünya taxıl ehtiyatının azalmaması fonunda qiymətlərin artacağını gözləmirik".
Bununla belə, nazir əlavə edib ki, gələcəkdə taxıl qıtlığı və qiymət artımından sığortalanmaq üçün dövlət öz taxıl ehtiyatını artırmaq niyyətindədir: "Artıq Kənd Təsərrüfatı, İqtisadiyyat və Sənaye, eləcə də Fövqəladə Hallar nazirlikləri bununla bağlı hökumətə təkliflər verib. Yaxın dövrlərdə hökumət taxıl ehtiyatının 500 min tondan 700-750 min tona qədər qaldırılması ilə bağlı qərar verəcək. Bu da əhalinin davamlı olaraq 6 aylıq taxıl və un məhsullarına olan tələbatının ödənilməsi deməkdir".
Nazir ölkəmizin taxıl ehtiyatlarının kifayət qədər olduğunu vurğuladı. Dünyadakı proseslər bizə heç bir qorxulu və riskli şərait vəd etmir, deyən nazir Heydər Əsədov əhalini narahat olmamağa çağırdı və proseslərin tam nəzarət altında olduğunu qeyd etdi.