Nazir Heydər Əsədov İsmayıllı rayonunda vətəndaşları qəbul etmişdir
Nazir Heydər Əsədov İsmayıllı rayonunda vətəndaşları qəbul etmişdir
Azərbaycan Respublikasının Prezidenti İlham Əliyevin tapşırıq və tövsiyələrinə uyğun olaraq mərkəzi icra hakimiyyəti orqanları rəhbərlərinin bölgələrdə vətəndaşların qəbulu davam etdirilir.
Mərkəzi icra hakimiyyəti orqanları rəhbərlərinin şəhər və rayonlarda vətəndaşların qəbulu cədvəlinə uyğun olaraq dekabrın 26-da kənd təsərrüfatı naziri Heydər Əsədov İsmayıllı şəhərində Ağsu, İsmayıllı, Şamaxı, Qobustan, Qəbələ və Abşeron rayonlarından olan bir qrup vətəndaşı qəbul edib.
Nazirliyin müvafiq struktur rəhbərlərinin də iştirak etdikləri qəbulda 40 nəfər vətəndaşın müraciətinə baxılıb.
Qəbulda əsasən təsərrüfat sahələrinin genişləndirilməsi, heyvandarlığın inkişafı, kiçik istehsal sexlərinin açılması üçün güzəştli kreditlərin verilməsi, subartezian quyularının vurulması, istehsal olunan kənd təsərrüfatı məhsullarının alışının dövlət səviyyəsində mərkəzləşdirilmiş qaydada təşkili və bu zaman qiymətləndirməyə nəzarət və s. barədə müraciətlər olunub.
Bir çox müraciətlər yerindəcə həllini tapıb. Araşdırılmaya ehtiyac olan bəzi müraciətlərin qanunvericiliyə uyğun operativ həlli üçün nazirliyin müvafiq struktur rəhbərlərinə konkret tapşırıqlar verilib. Nazirliyin səlahiyyətlərinə aid olmayan müraciətlər isə müvafiq strukturlara göndərilmək üçün qeydiyyata götürülüb.
Qəbula gələnlər yaradılmış şəraitdən razı qaldıqlarını bildiriblər.
