NODULYAR DERMATİT VİRUS XƏSTƏLİYİNİN VAKSİNLƏRİ ÖLKƏMİZƏ GƏTİRİLİB
NODULYAR DERMATİT VİRUS XƏSTƏLİYİNİN VAKSİNLƏRİ ÖLKƏMİZƏ GƏTİRİLİB
Yanarın 14-də virus mənşəli "nodulyar dermatit" xəstəliyi əleyhinə Türkiyə istehsalı olan vaksinin ilk partiyası ölkəmizə gətirilib. Bununla əlaqədar keçirilən mərasimdə iştirak edin Kənd Təsərrüfatı Nazirliyi yanında Dövlət Baytarlıq Nəzarəti Xidmətinin rəisi S. Rüstəmova jurnalistlərə məlumat verərək bildirmişdir ki, 2014-cü ilin yaya və payız aylarında ölkəmizin 35 rayonunda virus mənşəli "nodulyar dermatit" xəstəliyi müşahidə olunub və 6040 baş heyvan bu xəstəliyə yoluxub. Onlardan 5781 başı tam sağalıb, 259 başı isə yanaşı gedən xəstəliklərin təsirindən tələf olub.
Xəstəlik müşahidə edilən dövrlərdə baytarlıq qurumunun gücləndirilmiş iş rejimində çalışmasını diqqətə çatdıran xidmət rəisi qeyd etdi ki, kənd təsərrüfatı naziri cənab Heydər Əsədovun göstərişinə əsasən bütün yay və payız ayları ərzində Dövlət Baytarlıq Nəzarəti Xidməti gücləndirilmiş iş rejimində çalışmaqla, xəstəlik müşahidə edilən bütün bölgələrə ilkin baytarlıq yardımı göstərilmiş və heyvanlarda simptomatik müalicə tədbirləri aparılmışdır.
Xəstəlik ilk dəfə ölkəmizdə qeydə alındığından onun vaksinin olmadığını xatırladan S. Rüstəmova bildirdi ki, bu problem qısa zaman kəsiyində öz həllini tapdı. Belə ki, kənd təsərrüfatı naziri cənab Heydər Əsədovun tapşırığına əsasən Türkiyə dövləti ilə müqavilə bağlanıldı və bizdə qeydə alınan xəstəliyin ştammına uyğun vaksin istehsalına start verildi.
Xidmət rəisi bildirdi ki, bu vaksinlər hökumətə müraciət edilmədən daxili imkanlar hesabına alınıb və 12 milyon doza miqdarındadır. Artıq bu gün 8 milyon doza ölkəmizə gətirilib və soyuducusu olan anbara təhvil verilir. Vaksinlər hələlik anbarda saxlanılacaq və Kənd Təsərrüfatı Nazirliyinin bölgüsünə əsasən profilaktiki məqsədlə fevralın 15-dən sonra xəstəlik qeydə alınmış bölgələrə paylanılacaq və heyvanlar arasında peyvəndləməyə start veriləcəkdir.
Xəstəlik qeydə alınmış rayonlarla dağlıq və dağətəyi bölgələr arasında bufer zonanın yaradılması da nəzərdə tutulur.
Mərasimin sonunda S. Rüstəmova hazırda ölkəmizdə xəstəliklə əlaqədar vəziyyətin sabit olduğunu, yeni xəstələrin qeydə alınmadığını və epizootik vəziyyətin tam nəzarət altında olduğunu bildirdi.
